អង់គ្លេស៖ នាយករដ្ឋមន្រ្តីអង់គ្លេស លោក Borris Jonhson បានទទួលនូវវ៉ាក់សាំងដូសទី២ប្រភេទ AstraZeneca /Oxford របស់លោកនៅថ្ងៃនេះហើយ នៅវិទ្យាស្ថាន Francis Crick ចំកណ្តាលទីក្រុងឡុងដ៍ នៅថ្ងៃព្រហស្បតិ៍ ម្សិលមិញនេះ។
លោក Borris Jonhson បានបង្ហោះរូបភាពមួយសន្លឹកនៅលើបណ្តាញដែលជារូបភាពលោកកំពុងទទួលវ៉ាក់សាំង និងបានសរសេរថា៖ "ទទួលការចាក់ដូសទី២ រួចរាល់! នៅពេលដែលដល់វេនអ្នក សូមមកទទួលវ៉ាក់សាំង"។ គួររំឮកថា នាយករដ្ឋមន្រ្តីអង់គ្លេស Jonhson បានទទួលវ៉ាក់សាំងដូសទី១ របស់លោកនៅមន្ទីរពេទ្យ St. Thomas តាំងពីខែមីនាកន្លងទៅ។
យោងតាមរដ្ឋមន្រ្តីទទួលបន្ទុកលើកិច្ចការវ៉ាក់សាំង លោក Nadhim Zahawi បានឱ្យដឹងថា ចំនួនលើសពីពាក់កណ្តាលនៃមនុស្សពេញវ័យក្នុងប្រទេសអង់គ្លេស បានទទួលនូវវ៉ាក់សាំងប្រឆាំង និងបង្ការវីរុសកូវីដ-១៩ រួចរាល់ ពោលគឺចំនួនវ៉ាក់សាំងដូសទី២ជាង ២៦,៤លានដូស ត្រូវបានចុះបញ្ជីប្រើប្រាស់រួចរាល់ ចាប់តាំងពីយុទ្ធនាការផ្តល់វ៉ាក់សាំងនៅអង់គ្លេសបានចាប់ផ្តើមនៅខែធ្នូ ឆ្នាំ២០២០ កន្លងទៅ។
បច្ចុប្បន្ននេះ ប្រទេសអង់គ្លេស (England) កំពុងនាំមុខគេទៅលើប្រទេសចំនួន ៣ ផ្សេងទៀតនៃចក្រភពអង់គ្លេស (UK) ក្នុងការចុះបញ្ជីប្រើប្រាស់វ៉ាក់សាំងដូសទី ២ ខណៈប្រទេសអៀរឡង់ខាងជើង (Northern Ireland) មានអត្រា ៤៧,១ភាគរយ ស្មើនឹង ៦៨៤,៣៩៨ , ប្រទេសស្កុតលែន (Soctland) មានអត្រា ៤៨,២ភាគរយ ស្មើនឹង ២,១៣៧,៦១៨ ខណៈប្រទេសវែលស៍ (Wales) មានអត្រា ៤៥,៩ភាគរយ ស្មើនឹង ១,១៥៧,៩០៤៕